ក្បួនរថយន្ដទំនើបៗ Gumball 3000 នឹងមកដល់ប្រទេសកម្ពុជា គឺជាព្រឹត្តិការណ៍ជួបជុំរថយន្តសកល
ក្បួនរថយន្ដទំនើបៗ Gumball 3000 ដ៏ល្បីល្បាញលើពិភពលោក គ្រោងនឹងសំចតជួបជុំគ្នានៅក្នុងប្រទេសកម្ពុជា ដែលជាផ្នែកនៃដំណើរទេសចរណ៍ឆ្នាំ២០២៤របស់ខ្លួន។ ការធ្វើដំណើរមកដល់នេះ គឺជាលើកទីមួយហើយដែលព្រឹត្តិការណ៍នេះបានប្រព្រឹត្តិទៅក្នុងតំបន់អាស៊ីអាគ្នេយ៍។ Gumball 3000 ដែលត្រូវបានបង្កើតឡើងដោយលោក Maximillion Cooper ក្នុងឆ្នាំ១៩៩៩ មិនត្រឹមតែត្រូវបានគេស្គាល់ថាជាក្បួនរថយន្តប្រណិត និងទាក់ទាញវប្បធម៌ប៉ុណ្ណោះទេ ប៉ុន្តែក៏មានគំនិតផ្តួចផ្តើមសប្បុរសធម៌ផងដែរ។ ជារៀងរាល់ឆ្នាំ ការប្រមូលផ្តុំនេះបានទាក់ទាញក្រុមអ្នកចូលរួមចម្រុះ រួមទាំងតារាល្បីៗ ខ្សែរាជវង្ស និងអ្នកចូលចិត្តរថយន្តមកពីជុំវិញពិភពលោក។ សម្រាប់ព្រឹត្តិការណ៍ឆ្នាំ ២០២៤នេះ ដែលជាការប្រារព្ធខួបលើកទី២៥ នៃការប្រមូលផ្តុំគ្នា ត្រូវបានរំពឹងថា នឹងមានអ្នកចូលរួម ធ្វើដំណើរចម្ងាយ ៣ពាន់ម៉ាយ (ប្រមាណ ៥ពាន់គីឡូម៉ែត្រ) ក្នុងរយៈពេលប្រាំពីរថ្ងៃ។ ចាប់ផ្តើមនៅទីក្រុងសៃហ្គន ប្រទេសវៀតណាម ក្បួននេះនឹងឆ្លងកាត់ប្រទេសកម្ពុជា ថៃ និងម៉ាឡេស៊ី មុននឹងទៅដល់ប្រទេសសិង្ហបុរី សម្រាប់ការប្រកួតប្រណាំងរថយន្ត Formula 1 Grand Prix ដ៏មានកិត្យានុភាពនៅទីនោះ។ នៅក្នុងប្រទេសកម្ពុជា អ្នកចូលរួមនឹងទទួលបានបទពិសោធន៍ពីវប្បធម៌ដ៏រស់រវើក និងស្គាល់ពីប្រវត្តិសាស្រ្តនៃទីក្រុងភ្នំពេញ និងប្រាសាទអង្គរវត្ត ដែលជាតំបន់បេតិកភណ្ឌពិភពលោករបស់អង្គការយូណេស្កូ ក្នុងការធ្វើដំណើររបស់ពួកគេ។ រថយន្តទំនើបៗជាង ១០០គ្រឿងត្រូវបានរំពឹងថានឹងចូលរួមព្រឹត្តិការណ៍ដ៏អស្ចារ្យនេះ រួមទាំងទាក់ទាញអ្នកទស្សនារាប់ពាន់នាក់នៅតាមដងផ្លូវ ជាមួយនឹងការរៃអង្គាសប្រាក់សម្រាប់បុព្វហេតុសប្បុរសធម៌ផងដែរ។ បេសកកម្មនៃការជួបជុំក្បួនរថយន្តនេះ មិនត្រឹមតែបង្ហាញពីប្រណីតភាព និងល្បឿននោះទេ មិនតែប៉ុណ្ណោះគឺជាសកម្មភាពមនុស្សធម៌ជាចម្បង។ ព្រឹត្តិការណ៍នេះត្រូវបានរាយការណ៍ថា បានរៃអង្គាសប្រាក់ចំនួន ៧.៨លានដុល្លារសម្រាប់សកម្មភាពសប្បុរសធម៌ផ្សេងៗក្នុងរយៈពេលពេលប៉ុន្មានឆ្នាំកន្លងមកនេះ។ ក្បួនរថយន្ដប្រណិតៗចម្រុះពណ៌នឹងមកដល់រាជធានីភ្នំពេញជាផ្លូវការដែលរៀបចំសហការដោយក្រុមហ៊ុនជីប ម៉ុង នឹងបង្ហាញពីទីតាំងសំខាន់ៗរបស់ប្រទេសកម្ពុជា រួមមានវិមានឯករាជ្យក្នុងរាជធានីភ្នំពេញ និងប្រាសាទអង្គរវត្តដ៏អស្ចារ្យផងដែរ។ ដំណើរនេះនឹងជាការបង្ហាញពីបេតិកភណ្ឌវប្បធម៌ដ៏សម្បូរបែបរបស់ប្រទេសកម្ពុជានៅលើអន្តរជាតិ៕
