ឯកឧត្តម កាទេី មហាំម៉ាត់ណោសស្រុី រដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ហួត ហាក់ រដ្ឋមន្រ្តីក្រសួងទេសចរណ៍ ជាអធិបតីក្នុងពិធីបិទ វេទិកាទេសចរណ៍មូស្លីម ឆ្នាំ២០២៤
នារសៀលថ្ងៃទី១៨ ខែធ្នូ ឆ្នាំ២០២៤ ឯកឧត្តម កាទេី មហាំម៉ាត់ណោសស្រុី រដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ហួត ហាក់ រដ្ឋមន្ត្រីក្រសួងទេសចរណ៍ អញ្ជើញជាអធិបតីក្នុងពិធីបិទ វេទិកាទេសចរណ៍មូស្លីម ឆ្នាំ២០២៤ ក្រោមមូលបទ៖ “ភាពស្រស់ស្អាត នៃសុខដុមនីយកម្ម និងគោលដៅទេសចរណ៍មូស្លីម” ។
ឯកឧត្ដមរដ្ឋលេខាធិការ បានកោតសរសេីរ និងវាយតម្លៃខ្ពស់ ចំពោះក្រុមការងារទេសចរណ៍មូស្លីម ក្រសួងទេសចរណ៍ ដែលបានការខិតខំ និងបានសហការរៀបចំវេទិកាទេសចរណ៍មូស្លីមឆ្នាំ២០២៤ លេីកទីមួយនេះឡេីង ប្រកបដោយភាពជោគជ័យ។ ព្រឹត្តិការណ៍នេះ ក៏ជាសកម្មភាពមួយក្នុងចំណោមសកម្មភាពសំខាន់ៗ ដែលក្រសួងទេសចរណ៍ បាននឹងកំពុងយកចិត្តទុកដាក់ជំរុញ អនុវត្តផែនការអភិវឌ្ឍន៍ទេសចរណ៍មូស្លីម ៥ឆ្នាំ (២០២៣-២០២៧) សមស្របនឹងចក្ខុវិស័យរួមរបស់ក្រសួង និងបរិបទនៃវិស័យទេសចរណ៍សកលលោក ជាពិសេសរួមចំណែកលើកស្ទួយកិច្ចសហប្រតិបត្តិការ រវាងកម្ពុជា និងបណ្តាប្រទេសឥស្លាមផងដែរ ដូចដែល ឯកឧត្ដមរដ្ឋមន្រ្តី បានលើកឡើង កាលពីព្រឹកមិញ ។
ឯកឧត្ដមរដ្ឋលេខាធិការ បានណែនាំ និងផ្តល់អនុសាសន៍មួយចំនួនដូចខាងក្រោម៖
ទី១៖ សូមឱ្យអង្គវេទិកាយកខ្លឹមសារ និងលទ្ធផលនៃវេទិកាឆ្នាំ២០២៤នេះ យកទៅអនុវត្តក្រោមស្មារតីទទួលខុសត្រូវខ្ពស់ ដែលយើងអាចតាមដានការអនុវត្តនិងវាយតម្លៃនាឱកាសវេទិកាលើកក្រោយ ឆ្នាំ២០២៥។
ទី២៖ សូមឱ្យវិស័យឯកជន និងភាគីពាក់ព័ន្ធ បន្តកិច្ចសហការស្អិតរមួតក្នុងការបន្តជំរុញការផ្សព្វផ្សាយ ក៏ដូចជារៀបចំកញ្ចប់ទស្សនកិច្ចឱ្យមានភាពសំបូរបែប ពិសេសរួមគ្នារៀបចំ ព្រឹត្តិការណ៍នានា ដើម្បីជំរុញលំហូរទេសចរមូស្លីមឱ្យបាន កាន់តែប្រសើរបន្ថែមទៀត ។
ទី៣៖ ចូលរួមជំរុញ យុទ្ធនាការ៖ ប្រជាពលរដ្ឋម្នាក់ជាអ្នកផ្សព្វ ផ្សាយទេសចរណ៍កម្ពុជាម្នាក់ និងទេសចរណ៍ដើម្បីទាំង អស់គ្នា និងទាំងអស់គ្នាដើម្បីទេសចរណ៍ ដូចប្រសាសន៍ ឯកឧត្ដមរដ្ឋមន្រ្តី លេីកឡេីងកាលពីព្រឹកមិញ ។
ទី៤៖ អំពាវនាវឱ្យបងប្អូនវិស័យឯកជនក្នុងស្រុក បន្តពង្រឹងគុណភាពសេវាកម្មរបស់ខ្លួន ដូចជាម្ហូបអាហារ និងសេវាកម្មហាឡាល់ និងការបដិសណ្ធារកិច្ចមូស្លីម ដើម្បីត្រៀមលក្ខណៈសម្បត្តិឱ្យបានគ្រប់គ្រាន់ក្នុងការទទួលភ្ញៀវទេសចរមូស្លីម។
