ពិធីសម្ពោធពិព័រណ៌សិល្បៈ កម្ពុជា កូរ៉េ រួមគ្នានៅខេត្ដសៀមរាបសម្រាប់កិច្ចសហប្រតិបត្តិការផ្នែកវប្បធម៌ និង ទេសចរណ៍ឱ្យកាន់តែស៊ីជម្រៅរវាងប្រជាជាតិទាំងពីរ

នៅព្រឹកថ្ងៃទី២២ ខែកម្ភៈ​ ឆ្នាំ២០២៥នេះ នៅសារមន្ទីរជាតិអង្គរ ខេត្តសៀមរាប មានបើកសម្ពោធពិព័រណ៌ សិល្បៈកម្ពុជា កូរ៉េ ក្រោមអធិបតីភាពរបស់​ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និង វិចិត្រសិល្បៈ លោកជំទាវ ជ្រឹង បុទុមរងី្ស ឯកអគ្គរាជទូតកម្ពុជាប្រចាំនៅសាធារណរដ្ឋកូរ៉េ និង ឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប ព្រមទាំងឯកឧត្តម លោកជំទាវ អស់លោក លោកស្រី ជានាយកប្រតិបត្តិនៃសមាគមវប្បធម៌កូរ៉េ ក្រុមវិចិត្រករ និង សិល្បៈករ ថ្នាក់ដឹកនាំមន្ទីរ អង្គភាពជុំវិញ ខេត្តចូលរួមផងដែរ។

ក្នុងឱកាសដ៏វិសេសវិសាលនេះ ឯកឧត្តមរដ្ឋមន្ត្រី បានកោតសរសើរ និងថ្លែងអំណរគុណដល់លោកជំទាវ ជ្រឹង បុទុមរង្សី ឯកអគ្គរាជទូតកម្ពុជាប្រចាំសាធារណរដ្ឋកូរ៉េ ដែលបាននាំយកមកនូវការផ្សព្វផ្សាយ និងការចែករំលែកការផ្លាស់ប្តូរវប្បធម៌រវាងកម្ពុជា-កូរ៉េ ដើម្បីជំរុញ និងលើកកម្ពស់ក្នុងការផ្សព្វផ្សាយទេសចរណ៍វប្បធម៌រវាងប្រទេសទាំងពីរឱ្យមានលក្ខណៈទូលំទូលាយ សម្រាប់ទាក់ទាញភ្ញៀវអន្តរជាតិមកទស្សនាឱ្យកាន់តែច្រើនកុះករបន្ថែមទៀត។